MM Dataverse

Play to Earn Model မှာ ကစားသူတွေဟာ ဂိမ်းကစားရင်း cryptocurrency တွေ၊ NFT တွေကို ရရှိနိုင်ပါတယ်။ ဒီရရှိလာတဲ့ digital assets တွေကို တကယ့်ငွေအစစ်အတွက် ရောင်းချလို့ရတယ်။ ဥပမာအားဖြင့် Axie Infinity ဂိမ်းမှာဆိုရင် ကစားသူတွေဟာ Axie တိရစ္ဆာန်လေးတွေကို မွေးမြူပြီး တိုက်ခိုက်ကစားရတယ်။ အနိုင်ရတိုင်း Smooth Love Potion(SLP) token တွေရရှိပြီး ဒီ token တွေကို cryptocurrency exchanges တွေမှာ ရောင်းချနိုင်တယ်။

ကျွန်တော်တို့ ငယ်ငယ်တုန်းက Pokemon တွေ၊ Digimon Card တွေကို စုခဲ့ဖူးတယ်။ အဲဒီတုန်းက ဒီ character လေးတွေဟာ စာရွက်ပေါ်က ရုပ်ပုံလေးတွေ၊ ဂိမ်းထဲက pixel လေးတွေပဲ ဖြစ်ခဲ့တယ်။ ဒါပေမယ့် NFT နည်းပညာက ဒီ digital character တွေကို တန်ဖိုးရှိတဲ့ ပိုင်ဆိုင်မှုတစ်ခုအဖြစ် ပြောင်းလဲပစ်လိုက်တယ်။ CryptoKitties က ဒီသဘောတရားကို ပထမဆုံး လက်တွေ့အသုံးချခဲ့တဲ့ ဂိမ်းတွေထဲက တစ်ခုပဲ ဖြစ်တယ်။

ဒီစနစ်ရဲ့ အားသာချက်ကတော့ ကစားသူတွေအနေနဲ့ အပျော်သက်သက်ကစားရုံသာမက ဝင်ငွေရှာနိုင်တာပဲ ဖြစ်ပါတယ်။ အထူးသဖြင့် ဖွံ့ဖြိုးဆဲနိုင်ငံတွေက လူငယ်တွေအတွက် ဝင်ငွေရလမ်းတစ်ခု ဖြစ်လာတယ်။ ကိုဗစ်ကပ်ရောဂါကြောင့် အလုပ်အကိုင်တွေ ရပ်ဆိုင်းသွားချိန်မှာ Play to Earn ဂိမ်းတွေက အသက်ရှူပေါက်တစ်ခုလို ဖြစ်လာခဲ့တယ်။ ဖိလစ်ပိုင်နိုင်ငံမှာဆိုရင် မိသားစုတွေက Axie Infinity ကနေရတဲ့ ဝင်ငွေနဲ့ ရပ်တည်နိုင်ခဲ့ကြပါတယ်။ တချို့တွေဆိုရင် သူတို့နိုင်ငံရဲ့ ပျမ်းမျှလစာထက် ပိုမိုရရှိခဲ့ကြတယ်။

ဒါပေမယ့် ဒီစနစ်ရဲ့ အားနည်းချက်တွေကိုလည်း မျက်ကွယ်ပြုလို့ မရပါဘူး။ ပထမဆုံးအနေနဲ့ စတင်ရင်းနှီးမြှုပ်နှံမှု ကုန်ကျစရိတ်က မြင့်မားပါတယ်။ ဥပမာ Axie Infinity မှာ Axie သုံးကောင်တွဲ တစ်စုံဝယ်ဖို့ အမေရိကန်ဒေါ်လာ ရာဂဏန်းကနေ ထောင်ဂဏန်းအထိ ကုန်ကျပါတယ်။ ဒါ့အပြင် cryptocurrency market ရဲ့ မတည်ငြိမ်မှုကလည်း ကစားသူတွေရဲ့ ဝင်ငွေအပေါ် သက်ရောက်မှုရှိတယ်။ token စျေးကျသွားရင် ဝင်ငွေလည်း လိုက်ကျသွားတာပေါ့။

Play to Earn ဂိမ်းတွေရဲ့ နောက်ထပ်စိန်ခေါ်မှုတစ်ခုက စီးပွားရေးစနစ် ရေရှည်တည်တံ့ဖို့ပဲ ဖြစ်တယ်။ ဂိမ်းကုမ္ပဏီတွေအနေနဲ့ token economy ကို သေချာစီမံခန့်ခွဲဖို့ လိုအပ်တယ်။ token အသစ်တွေ အမြဲထုတ်ပေးနေရတာကြောင့် ဖောင်းပွမှု(inflation) ဖြစ်နိုင်တယ်။ ဒါ့ကြောင့် token burning လိုမျိုး နည်းလမ်းတွေနဲ့ ထိန်းညှိရတယ်။ တစ်ဖက်မှာလည်း ကစားသူအသစ်တွေ ဝင်ရောက်လာနိုင်အောင် အခွင့်အလမ်းတွေ ဖန်တီးပေးဖို့ လိုအပ်တယ်။

ဒီနေရာမှာ Guild system တွေက အရေးပါတဲ့ ပုံစံနှင့် ပါဝင်လာပြန်တယ်။ Guild တွေက NFT တွေကို ဝယ်ယူပြီး ကစားသမား (Scholar) တွေကို ငှားရမ်းကစားစေတဲ့ စနစ်ဖြစ်တယ်။ ဒီစနစ်က ရင်းနှီးမြှုပ်နှံဖို့ မတတ်နိုင်တဲ့သူတွေအတွက် အခွင့်အလမ်းတစ်ခု ဖြစ်လာစေခဲ့ပါတယ်။

လာမယ့် ဆယ်စုနှစ်ကာလများမှာ Play to Earn Model က ဘယ်လိုပုံစံနဲ့ ဆက်လက်ဖွံ့ဖြိုးမလဲဆိုတာက စိတ်ဝင်စားဖို့ ကောင်းတယ်။ Star Atlas လို metaverse ဂိမ်းတွေ၊ Splinterlands လို card ဂိမ်းတွေက ပို၍ရှုပ်ထွေးပြီး စိတ်ဝင်စားဖို့ကောင်းတဲ့ စီးပွားရေးစနစ်တွေကို မိတ်ဆက်လာနေပြီ ဖြစ်ပါတယ်။ virtual land တွေ ဝယ်ယူခြင်း၊ ငှားရမ်းခြင်း၊ NFT marketplace တွေမှာ ကုန်သွယ်ခြင်း စတဲ့ လုပ်ဆောင်ချက်တွေက ဂိမ်းလောကကို ပိုပြီးတော့ အကျိုးအမြတ်ရစေမှာ ဖြစ်ပါတယ်။

Original Article – https://medium.com/@minsithu_53495/play-to-earn-model-187ad1e82798